Тусгаар тогтнол чамайг тунхаглан бичнэ би

2016 оны 12 сарын 29

Ардын уран зохиолч, Төрийн шагналт зохиолч Д.Пүрэвдоржийн “Тусгаар тогтнол чамайг тунхаглан бичнэ, би” шүлэг бол туурга тусгаар Монгол улсад төрсөн хүн бүрийн сэтгэлийг огшоосон бүтээл. Энэ шүлгийг бичсэнээрээ Д.Пүрэвдорж тухайн үедээ үндсэрхэг үзэл гаргасан хэмээн буруутгагдаж, хэвлэхийг хориглон, Төрийн шагналд бүтээл нь дэвшихэд МАХН-ын Төв хорооноос удаа дараа хасч байсан ч олон түмний хүсэлтээр 1981 онд арга буюу Төрийн шагналыг олгож байжээ.

Ханат цагаан гэрийн од хийморийн тоонон дээр

Хасаг халуун тулганы омог дөрвөн тотгон дээр

Хан Алтай аавын онгон тэргүүн оргил дээр

Хатан Сэлэнгэ ээжийн одод орчих мандал дээр

Тусгаар тогтнол чамайг

Тунхаглан бичнэ би

Ганган улаан тэмээний зогдор дэвсэх тэшил дээр

Гантай мөнгөн хэтний зоолог тээх тээгэн дээр

Галбын халуун говийн хулан ангах ээрэм дээр

Гантиг чулуун хясааны янгир халих элгэн дээр

Тусгаар тогтнол чамайг

Тунхаглан бичнэ би Хүж дурдан бүсний ташаа дарах нугалаан дээр

Хүрэл манан хөөргөний даалин дарах наргиан дээр

Хүйсийн шүүдэр буусан уулын гацаа бууцан дээр

Хүннү дээдсийн тамгалсан улбаа гархин буурин дээр

Тусгаар тогтнол чамайг

Тунхаглан бичнэ би

Ширмэн төмөр дөрөөний шивээ зурах тавган дээр

Шижир алтан ээмэгний шигтгээ чимэх гархин дээр

Шинийн хоёрны саран хаяарч шингэх тэнгэр дээр

Шинэ нялх ногоо ханшиж задрах газар дээр

Тусгаар тогтнол чамайг

Тунхаглан бичнэ би

Аавын мөнгөн хазаарын найман цэнгийн товруун дээр

Азын алаг мэлхийн наян нэгэн шагайн дээр

Алиахан саарлын унага хөллөн тэнцэх нуга дээр

Ангирын хоёр дэгдээхэй хөвөн цэнгэх нууран дээр

Тусгаар тогтнол чамайг

Тунхаглан бичнэ би

Индэр улаан галын цац бадман дөлөн дээр

Ижил хоёр загалын цацаг шанхан дэлэн дээр

Идэр гурван есийн цас чахрах цайдам дээр

Есөн голын цан хөөрөх царман дээр

Тусгаар тогтнол чамайг

Тунхаглан бичнэ би

Бэлгийн цэнхэр хадагны хоёр гардах дэлгээс дээр

Бэхэн хар гэзэгний хосоор дарах сүлжээс дээр

Бэрийн домогт цэцгийн хорвоо уярах дэлбээн дээр

Бидэрт мөнгөн сарны хоймор унах туяан дээр

Тусгаар тогтнол чамайг

Тунхаглан бичнэ би

Урсгал татмал усны хөл алдах ёроол дээр

Ургамал таримал модны хөрсөнд хавах ёзоор дээр

Уяран мэлмэрэх янагийн дурлал амилах харцан дээр

Уйлан мэндлэх үрийн дуулан орхих манцуйн дээр

Тусгаар тогтнол чамайг

Тунхаглан бичнэ би

Ажнай сайн хүлгийн гал цахилах тууран дээр

Аагисан улаан хүдрийн ган царцах хайлш дээр

Амар түвшин жаргалтай ам бүлийн дансан дээр

Алтан босго өлзийтэй айл бүхний үүдэн дээр

Тусгаар тогтнол чамайг

Тунхаглан бичнэ би

Баяр найрын ширээний амтат тансаг идээн дээр

Баян хангайд мөнхөрсөн арц хуш зээгэн дээр

Балтаар давтан хийсэн анжисны торгон ирэн дээр

Багц дүүрэн ургасан атрын тарианы мөрөн дээр

Тусгаар тогтнол чамайг

Тунхаглан бичнэ би

Эрт айлын хаяа дархан хилийн дээсэн дээр

Энхтайвны харуул дайчин эрсийн тангараг дээр

Эрдэнэ зуугийн хэрэмний зуун найман суварга дээр

Энэ зууны өргөөний зуун түмэн цонхон дээр

Тусгаар тогтнол чамайг

Тунхаглан бичнэ би

Эрх чөлөөний зарлиг ардын үндсэн хууль дээр

Эрх хэл соёлынхоо ад биш баян сан дээр

Эрдэнэтийн арга билиг алтан соёмбын гачил дээр

Эх нутгийн шорооны амиар солих ширхэг дээр

Тусгаар тогтнол чамайг

Тунхаглан бичнэ би

Аав ээжийн буянтай өлзийт цагаан хоймор дээр

Амин гарвалын толботой өлгийт нялхсын өөжин дээр

Ардын журамт цэргийн өргөж ялсан туг дээр

Амьсгалаа бидэнд өгсөн өрлөг дээдсийн дурсгал дээр

Тусгаар тогтнол чамайг

Тунхаглан бичнэ би

Хан тэнгэрт сүмбэрлэсэн үйлдвэр уурхайн яндан дээр

Хаяа нийлж сүндэрлэсэн үлгэрийн харшийн туурган дээр

Хангай говь талын үлэмжийн өв баялаг дээр

Халуун эх оронч бүхний үндэсний их бахархал дээр

Тусгаар тогтнол чамайг

Тунхаглан бичнэ би

Сав саваар саалийн харваж хүрэхгүй зэлэн дээр

Сая саяар сүргийн хатирч хүрэхгүй билчээр дээр

Сар нарны өртөөнд хагацаж болшгүй учрал дээр

Сайхан монгол орноо хайрлаж ханашгүй ерөөл дээр

Тусгаар тогтнол чамайг

Тунхаглан бичнэ би

Өглөө бүрийн нарны асгаран буух цацрал дээр

Өвгийн морин хуурын аялгуу хослох утсан дээр

Өргөн цээж чөлөөтэй амьсгалж яваа газар дээр

Өөрийн толгой мэдэлтэй амьдарч яваа заяан дээр

Тусгаар тогтнол чамайг

Тунхаглан бичнэ би

Ухаа хонгорын жолоог захлан татсан талбай дээр

Ухаант жанжин Сүхбаатарын зарлан дуудсан тунхаг дээр

Улаанбаатар нийслэлийн заяа тэтгэх дээвэр дээр

Улсаа ачлан захирсан засаг төрийнхөө ордон дээр

Тусгаар тогтнол чамайг

Тунхаглан бичнэ би

Нүүрэнд нь гал бадарсан монгол эцгийн хийморь дээр

Нүнжгэнд нь нар гэрэлтсэн монгол эхийн сэтгэл дээр

Нүүдлийн өргөөнд нэгдсэн монгол аймгийн холбоон дээр

НҮБ-ын шилтгээнд заларсан монгол улсын далбаан дээр

Тусгаар тогтнол чамайг

Тунхаглан бичнэ би

Эзэн сууж жаргасан их заяагаа сүсэглэж

Эх орон талынхаа ирээдүйн таалалд нийцүүлж

Эрдэнэсийн далайгаас шүүрдсэн итгэлийн сувд үгсээр

Эрх жаргалаа баталсан иргэн бүхний гараар

Тусгаар тогтнол чамайг

Тунхаглан бичнэ би.

АНХААРУУЛГА: Уншигчдын бичсэн сэтгэгдэлд news.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.
Сэтгэгдэл бүртгэгдээгүй байна